За нас

Градот Велес е меѓу првите градови во Македонија каде своевремено започнало да се реализира основно, а подоцна и повисоко образование на словенски, народен јазик. Иако Цариградската патријаршија своевремено не допуштала и најстрого казнувала за држење на словенска богослужба, во црквите во Велес се служело на словенски јазик. За одржување и ширење на ваква писменост посебна улога одиграл метохот „Св. Атанасиј“, кој датира од околу средината на XVIII век.

Нешто подоцна во 1856/57год. во непосредна близина на овој метох е изграден уште еден под името „Св.Кирил и Методиј“ и истиот набрзо се оформил во првото училиште во Велес. Оваа зграда како училиште и привиден метох останала се до дваесетите години на XX век, кога е изградено новото училиште во долниот дел на дворот, многу поголемо од дотогаш постоечкото. 

Низ своето постоење училиштето претрпело разни реконструкции, за да во 1977/1978 година е целосно обновено и проширено и го добива денешниот  изглед.

Училиштето се состои од два објекта кои се меѓусебно поврзани и со својата целина ги задоволува во целост основните услови и педагошки норми за нормално одвивање на воспитно-образовна работа.

Со денешниот изглед училиштето „Св. Кирил и Методиј“ плени со  својата специфична архитектура, по што е препознатливо не само во градот туку и многу пошироко. Од неговата изградба, па до ден денес во основното училиште „Св. Кирил и Методиј“ Велес, традицијата на словенската писменост никогаш не е прекината, исто како и празнувањето и чествувањето на имињата на Сесловенските просветители, Светите браќа Кирил и Методиј. Во неговата историја се врежани имиња на голем број познати културни дејци, имиња од македонската историја, спортски доајени: Коста Солев Рацин, Петре Прличко, Тихо Најдовски, Васил Тоциновски, Александар Донев, Пепи Манасков и многу други.

Денес во основното училиште Св. Кирил и Методиј се образоваат и воспитуваат ученици преку современи форми, методи и техники на учење, примена на современи нагледни средства, а истовремено се  следат современите промени во образовниот систем.

Тоа е модерно и современо училиште во кое наставата се изведува според најсовремени проекти, а вработените имаат редовни едукации со што успеваат да бидат во тек со современиот напредок на науката и техниката, а воедно да спроведуваат и одличен воспитно - образовен процес.

За одбележување и почит се многубројните награди и признанија што учениците ги добиваат и освојуваат континуирано по разни области и предмети во текот на своето школување.

Наградите и признанијата што ги има добиено ова училиште се многубројни, а ние би споменале само дел: Климентово слово, Курирче, Спомен плакета по повод 9ти-Ноември, Признание за 150 години постоење на ООУ „Св. Кирил и Методиј“. 

Горди сме на овие признанија кои ни даваат волја и стремеж за понатамошно успешно дејствување во сите сфери на воспитно - образовниот процес. Наша цел ќе биде да продолжиме кон освојувања на нови предизвици, кон постигнување успех, кон создавање на идни генерации на кои ќе се гордеат родителите, ќе се гордееме ние - нивните наставници, ќе се гордеа нашата држава.